SHAYAMANZI SE MISSIE

Shayamanzi se missie is tweeledig van aard, naamlik:

Om ’n wetenskaplike studie van die luiperds van Shayamanzi en later die hele Waterberg te doen, gelei deur Prof J du P Bothma van die Universiteit van Pretoria wat reeds dekades die geheime van die luiperds van die Kalahari ontrafel en te boek stel. Die gegewens uit die Waterberg sal ontleed en dan vergelyk word met dit wat deur omvattende navorsing oor baie jare heen oor die luiperds van die Kalahari bekend geword het. Die Kalahari en die Waterberg is beide ongenaakbare omgewings wat die aanpassingsvermoë van ’n groot roofdier soos die luiperd terdeë beproef. Aanvoorwerk vir hierdie studie is reeds deur twee nagraadse studente in natuurlewebestuur van die Universiteit van Pretoria in 2001 gedoen. Hulle het reeds bepaal dat ’n luiperd minstens elke sesde dag Shayamanzi besoek, maar dit word vermoed dat daar nou ’n groter en meer gereelde teenwoordigheid bestaan omdat die gebied besig is om geleidelik ekologies te herstel.

Om ’n besigheidsanalogie met die luiperd as ’n strategiese karakter daar te stel, sketse oor sy lewenswyse en impak te maak, visuele materiaal te produseer en ’n dagboek te hou ten einde ’n interessante webwerf www.shayamanzi.com te ontwikkel en te vestig. Hierdie deel van die soektog na die besigheidstoepassings wat daar in die gedragsekologie en veral die aanpasbaarheid van die misterieuse luiperds van Shayamanzi opgesluit lê, sal plaasvind onder die leiding van die bekende sakeman en die eienaar van Shayamanzi, Mnr J Parsons. Saam met sy vrou Issie en sy kinders Bennert en Izelle sal Jannie Parsons die kern vorm van ’n soekgroep wat ook hulle familie, vriende, kennisse, kliënte en alle luiperdentoesiaste sal insluit. Die uitgangspunt sal wees dat ’n lewende luiperd op Shayamanzi en elders ’n enorme morele en finansiële bate is. Die uiteindelike mikpunt is om die huidige persepsie onder talle grondeienaars te verander sodat hulle ’n luiperd as ’n gesogte bate eerder as ’n onwenslike probleemdier begin sien. Daardeur word die luiperd die fokus en hoeksteen van die wildbedryf eerder as die meulsteen wat dit tans nog vir baie mense is. Die uiteinde is ’n verbeterde bewaringsstatus en verhoogde biodiversiteit.

SHAYAMANZI SE VISIE

Shayamanzi se visie is dat die antwoorde wat deur dié soektog na en navorsing oor die misterieuse luiperds van Shayamanzi in die Waterberg ontsluit word sal bydra om ’n wêreldwye liefde vir die luiperd te ontwikkel en te vestig. Sodoende sal die lewenskwaliteit van alle wesens verhoog word.